Handwark? Pleeg? Medien? – Wat denn nu?
Eerste Berufsbillens-Mess in Mildstedt hölpt junge Lüüd op Platt 

En Bericht vun Ingwer Oldsen

 

„School is nich mehr so dat för mi.“ meent Tim. He kummt ut Eiderstedt un harr över de Plattdüütsche Nordjob-Mess in Mildstedt leest in’t Blatt. Un sik glieks op de Weg maakt. „Eegenlich will ik wat lehrn mit Tweeradmechanik oder as Karosseriemaker. Ik bün ok al bi Firmen ween un heff mi vörstellt. Avers en beten wiederkieken is nich verkehrt.“ Sodenni kummt he in Snack bi Lüüd ut Handwark. En List mit Autowarksteden hett he in‘e Hand.

 

4 DSCI00582


Büro? Dokter? Finanzamt? Wat is richtig? Dor warrt nieli in’e Runn keken op all de Infotafels un Opstellers un in de Flegers vun de Firmen. Wat Soziales, ok Oogendokter, Krankenhuus un Oolenpleeg steiht op de Zettel. Avers ok IT-Medien, Finanzamt un Bank interesseern. Nu heet dat kieken, fragen un sik informeern. Mit de richtigen Lüüd snacken un en beten Glück bi’t Utsöken hört ok dorto.


Corinna Peters (nordjob) un Gesa Retzlaff (Plattdüütsch Zentrum Leck) freuen sik över de Loop bi soveel junge Lüüd un de grootordig professionelle Hölp vun Firmen mit dulle Utbillenssteden. De grote Mensa vun de Gemeenschaftsschool Mildstedt wiest en bunte Bild as Messehall.

 

nordjob2

 

Press un Rundfunk hebben de Idee vun en Nordjob-Mess op Platt mit Begeisterung opnahmen. En Shuttle-Service gifft dat vun de Husumer Bahnhoff hen na Mildstedt. Un de Mensa lett Rabatt, wenn een Kaffee oder Brötchen bestellt op Platt.


„Landwirtschaft kummt för mi nich in Fraag – dat will mien Schwester Sige al.“ Verkloort Lienke Jürgensen. Se geiht to School in Dänemark un will studeern. Hüüt hett se en Klapprekner vör sik un informeert över 170 Melkkeu vun de 400 Tiern bi’t Huus in Högel.

En Dischdeek as ut Stroh, lütte Tiern un en Modelltrecker maken allens professionell. Lienke ehr Öllern seggen: „Landwirtschaft heet nich blots Treckerfohren. Landwirtschaft is Arbeit mit Tiern, mit Natur un mit Technik. Een de richtig will, de kriggt ok en Steed op’n Buernhoff.“ „Man,nich blots Mama anropen laten. Sülms is de Kirl.“ Gifft Fru Jürgensen Raat.

 

Eltern Jürgensen
 


De Firma HEIWE Sanitär wiest, wodenni Heizungs-Rohrn tosamenbuut warrn. In en niege Huus warrn all Leitungen fotografeert, dormit een de ok wedderfinnen deit.  De Fima Görtzen weet, woveel Kreativität för Goornbu nödig is. De ADS-Grenzfriedensbund präsenteert ganz veel Billers mit Poppen to’n Lehrn vun all de lütten Spraken in’t Noorden vun Sleswig-Holsteen. H&P Stüerberaders hebben all de Infos op Platt un op Hochdüütsch. Bi de VR-Banken un Sporkassen steiht en plattdüütsche Umgang mit Kunnen ganz baven an. De sh:z un de Kreis Nordfreesland beden verscheden Möglichkeiten sik uttobillen. Sogor en Duale Studium is dorbi. Bi de ambulante Pleegdeenst Carstensen warrt de Blootzucker meten. „En kollegiale Umgang in unse Team is uns ganz wichtig.“ HanseWark, Kreishandwark, Abeitsamt, Projekt „Rüchwind“ un bi Afkaat Jannsen – bi se all laten sik Infos finnen, de een noch nich kennt hett. Bi de Fraag an HEIWE Elektro, ob denn nu all de junge Lüüd Leitungen un Schalters tosamen buun könnt, meent René Jensen ganz dröög: „Hett klappt. Kiek di um. Överall brennt Licht.“

 

Gruppenbild Mildstedt