Jan Graf is Referent för Plattdüütsch un Freesch bi de Sleswig-Holsteensche Heimatbund (SHHB) un böverste Organiserer vun de plattdüütsche Leeswettstriet. He harr sik ut de Noot rut, dat Lüüd nich mehr tosamenkamen dorven, utspekuleert, dat all Lesers besöcht warrn schullen, um emme Vördrag as Video optonehmen. För de Finalisten ut de Noorn hett Gesa Retzlaff vun dat Plattdüütsch-Zentrum Leck disse Törn övernahmen.

Bi de Familien ankamen weer de Leesplatz överall al torecht. Je na Huusholt stellten Mudder, Vadder, Geschwister un Grootöllern dat Publikum. Vör dat Opnehmen losgahn kunn, steeg de Spannung nochmal besunners, wenn de Starters wörpeln mussen, welke vun de fief Texte, op de se sik vörbereitet harrn,  vördragen warrn schull. Denn hete dat „Kamera löppt“:  Heft opslagen, en poor Wöör över sik vertellen, Text vörlesen, begeisterte Applaus vun de Tohörers afhalen, sik noch en lütte Gastgeschenk utsöken, Biller knipsen un töven... Binah söss Wuchen. Denn eerst, as de Videos vun all 13 Lesers ut dat ganze Land dreiht, an de Jurylüüd verschickt, ankeken, bewertet un denn in en Online-Drapen mit all afstimmt weren, stunnen de Siegers un Platzeerten fast.

Eerst kunnen Bosse ut Golbek, Wencke ut Groot-Rheid un Hanna ut Fohrdörp dat knapp faten, as dat Bott keem: Se sind Landessieger:in in ehr Öllersklass vun „Schölers leest Platt“. Dorna weer dat Juuchei groot. Ok Sina ut Schwesing un Solveig ut Eckernför freuten sik över jemehr twete un veerte Finalplatz bi disse Dörgang, to de 265 Scholen Kandidaten in’t Rennen schickt harrn. De Bedeligten warrn disse un vele Momente mehr vun de Wettstriet-Törn, de 2020 so ganz anners lopen is as sunst, nich vergeten. „En ganz grote Loff un Dank an all Lesers un jemehr Wegbegleiters, de mit disse besunneren Umstänne so apen un sülvstverständlich umgahn sind. Dat weer en Freud jem to beleven!“ faat Gesa Retzlaff de Geist vun ehr Rundtour in’n Noorn tosamen.

De plattdüütsche Leeswettstriet warrt all twee Johr vun de Heimatbund in Tosamenarbeit mit de Plattdüütsch-Zentren, de NDR un dat IQSH utrichtet. Föddert warrt de Reeg vun de regionalen Spoorkassen in’t Land un de Spoorkassenstiften. Bi’t Dörföhren ünnerstütt de Bökerievereen. Ditmal hett unse Ministerin Karin Prien ehren Schirm över de Wettstriet holen. Schölers vun de 3.-10. Klass könen in dree Öllersgruppen mitmaken. De nächste Runn fangt dissen Harvst wedder an. Mehr to weten kriegen un de Leeshefte ut de letzte Dörgang daalladen kann man in’t Internet ünner www.heimatbund.de.