Böörni funnen

Dat över fofftig Kinner bi dat Speel mitmaken worrn, dor harr keen mit rekend. Kinnergoornleiterin Nanke Jepsen is bannig dankbor un stolt op ehr Lüüd, de sik veel Gedanken maken un mit Hartbloot dorför insetten Kontakt na de Kinner, de tohuus blieven möten, un jemehr Familien to holen. Een Busteen dorbi is dat Filmprojekt mit de Handpopp Böörni. In de Tieden, in de wegen de Corona-Oplagen keen Regelbedriev in de Kinnergoorn un -hort mööglich is, sünd intwüschen teihn Episoden rutgahn.

 

Kennten vör een Johr man blots enkelte Kinner de fidele un niegschierige Plattsnacker Böörni, is he nu en echte Star. De Tokiekers töven jedes Mal al gespannt op de nächste Utgaav, to de an’t Enn vun jede Folg ümmer överleitet warrt. Poppenspelerin Sandra un Kamerafru Tanja hebben mit emme Idee, de vun de Kollegen interesseert un ievrig ünnerstütt warrt, eenfach losleggt un bi’t Maken denn mit de Tiet ümmer mehr över dat Video dreihen lehrt. De List för denkbore Themen is lang. Utsöcht warrt dorna, wat de Kinner jüst besunners beschäftigt oder dran ween weer, wenn allens „normal“ bleven weer.

 

In’t letzte Fröhjohr harr egentlich en Utflucht in’t Watt maakt warrn schullt. Statt mit alleman gung de eerste Tour denn mit Böörni na Lüttmorsiel, um bi Ebb na Wattwörmer un annerswat to buddeln. Kloor leeg dat Thema Corona bavenop. Böörni weer na Fru Dokter Krieger hen, um doröver wat to weten to kriegen. Denn hett he Lüüd besöcht, de to de Kinnergoorn hören: De Leiterin in ehr Büro, Erzieherinnen bi sik tohuus, Huusmeister Helmut bi sien anner Arbeit op de Karkhoff, de niege Paster in de Kark.  Anner Themen funnen sik, wiel se in de Johresrhythmus jüst an de Reeg weren, so as de Footgängerföhrerschien oder in de Adventstiet de Weg vun Maria un Josef na Bethlehem, de traditionell in de Kinnergoorn opbuut un lopen warrt. De Snitzelagd weer en Sonderutgaav. De Anregen dorto keem dör en Anfraag vun Gemeendepastorin Dr. Weide. De Geschicht vun dat verloren Schaap duch ehr ideal för Böörni. Dat duch sien Team ok un los gung dat mit Planen un Umsetten. Tostellt kriegen de Familien de fardigen Videos, in de dat jedes Mal ok wat to Basteln oder en anner lütte „Huusopgaav“ gifft, um de Kinner to’n Mitmaken antoregen, per Rundmail.

Ohne Corona harr dat dat Projekt tominnst so nich geven. Dat Filme maken kost veel Tiet, de jüst blots dör dat Arbeiten vun Tohuus ut över is. Un wiel de beiden Fruens as Hauptakteure dor so veel Spaaß an hebben, geven se ok vun jemehr Frietiet noch wat dorto. Jemehr Familien stahn vull achter de Saak un helpen ok mal mit vör un achter de Kamera, as Testkiekers oder toletzt bi de däägliche Kontrullgang lang de Snitzeljagd-Streek, dat ok all Buddeln noch heel un an emme Platz weren.

 

 

Böörni un sien Crew weren sogor nu nomineert för de Medienkompetenzpries 2021 vun dat Land Sleswig-Holsteen. Disse Pries würdigt Bispele vun besunners goot glückte Medienarbeit. Ünner 46 Insenners höörde dat Format mit de plattdüütsche Schaapspopp to de Endutwahl. Dat alleen is al en grote Erfolg un Anerkennen, ok wenn de dree eersten Plätze an Mitstrieders gungen. För de engsten Kollegen vun Böörni, Sandra Kemper-Petersen un Tanja Krien (Foto), blifft neven de Stütt vun de MItmakers ut de egen Familien, dat Kollegium un de Gemeende un de positiven Rüchmellen vun Kita-Öllern de gröttste Lohn dat Lüchten in de Ogen vun de Kinner.