Deelnehmers weren ok Vertreders vun anner Mitgliedsgemeenen, vun Heimatvereenen, vun de Plattdüütsche Raat S-H, vun dat IQSH un ok en Reeg Privatpersonen as Mitglieder. För de hauptamtliche Deel weer Gesa Retzlaff as Zentrumsleitung dorbi. Tosamen weren goot 40 Lüüd ut de ganze Landsdeel Slesvig anreist. Johannes Callsen as Beopdragte för Minnerheiten un Plattdüütsch müss kortfristig afseggen, wiel he för de Politik in Berlin bruukt wurr. He harr aver sien Gröten as Video-Bott schickt.

 

Truels Hansen geev Bericht över de Vörstandsarbeit un Gesa Retzlaff to ehr Arbeitsfeld un wat umsett warrn kunn. Dat gifft Kurse för Lüüd, de mit Plattdüütsch in Kinnergoorns arbeiden, de Klöönrunnen anbeden wöllt oder de in de Pleeg oder Betreuung ehren Deenst doon. Nieg is en Anbott as Bildungsurlaub to Platt lehren an de Nordsee Akademie in Leck. Ok worrn goot de Hälfte vun de Modellscholen in’t Land, an de dat Plattdüütschünnerricht gifft, mitbetreut.

 

Jüst noch vör de Coronatiet kunn dat 25-jährige Bestahn mit 25 grote Akschonen ünner dat Motto „Platt hett wat“ fiert warrn. In Coronatieden leep denn allens wat anners as sunst un mehr digital, aver dat geev keen Stillstahn. Anfang düt Johr is en Umfraag bi all Kommunen in de Landsdeel Sleswig maakt wurrn, um en Indruck vun de Situatschoon in de Region to kriegen un to hören, wat för en Stütt bruukt warrn kann.

 

En Thema drifft de Vereen opstunns besünners an: dat Plattdüütsch-Zentrum bruukt en niege Rechtsform. Truels Hansen verkloort wodennig sik de Vereen dorbi inbringen kunn. Erich Petersen, 2. Vörsitter, stellt de enkelten Gremien un Tostännigkeiten för tokamen Tieden vör. Ut de Deelnehmerrunn geev dat dorto en poor Fragen un Anregens, de opnahmen wurrn.

 

In de Daagsornen gung dat wieder mit Kassenbericht un Friespreken vun Kassenwart un Vörstand. De Bericht spegelt en solide Kassenlaag wedder, wiest aver ok keen finanzielle Speelruum ut. Sodennig weer dat konsequent, en niege Bidragsornen mit‘n moderate Erhöhung to besluten – beides leep eenstimmig af.

 

To’n Sluss geev dat noch wat för de Ohren un för’t Hart: Gotje un Lennes Hinrichsen ut Haselund lesen ut dat niege plattdüütsche Kinnerbook „Arlewatt un Ollerup“, dat vun de Fördervereen bi’t Rutgeven gewaltig ünnerstütt wurr.

 

Text: Erich Petersen