Also: En Barcamp is en Drapen (egens mit Övernachten – dorüm camp), wo Lüüd tosamenkaamt, de för jichtenswat brennt. Un de ehrn Drift mit anner Lüüd deelen wüllt. Dat gifft keen fasten Plaan mit Themen. De Deelnehmers maakt ehr Programm sölben. Ideen sammeln, mitmaken, deelen, uttuschen, schnacken, wat mitnehmen, wiedergeven. „Geplant ungeplant“, so nöömt dat Gesa Retzlaff in ehr Reed. Se hett de Leit vun’t Plattdüütsch Zentrum in‘ Lannesdeel Sleswig un hett dat dore Platt-Camp mit op’n Wech bröcht. Un twaars tosamen mit ehrn Zentrums-Naver, de Nordsee-Akademie. Dor sitt Dr. Herle Forbrich vun‘ Kulturknotenpunkt Nordwest un Aaron Jessen, de de Leit vun’e Akademie hett. De Dree hebbt sik fraagt: „Woans künnt wi verscheden Plattschnacker ut ganz verscheden Rebeete tosamenbringen, üm so richtig Drift to kriegen? „Wi wölen Minschen tosamenbringen, de mit uns delen mögen, wat se andrieven deit“, heet dat in de Inladen.

 

Föfftig Lüüd un veele Ideen op en Hupen

 

Ut all de Tampens wüllt se en groot Knütten slaan. Un wo geiht dat wull beter as in Nordfreesland, meent Herle Forbrich. Hier sünd doch all de lütten Spraken tohuus: Platt, Däänsch, Sönnerjüsk un Freesch. Un dor weer ok würkli jedeen Spraak mit in’t Camp vertreden. Un noch veel mehr. Jedeen hett mol vertellt, wat he för Spraken verstahn oder schnacken kann. Dor weer Isläändsch dorbi, Engelsch, Franzöösch, Hindi, Plattdäänsch, Spaansch, Italiensch . . . dat lett sik gor nich an twee Hannen optellen.

Aver an düssen Dag güng dat üm den Drift för uns lütte Spraken. Föfftig Lüüd mit en Hupen Ideen un den nödigen Drift sünd nu an’e Reeg west, denn: „De Dag warrd vun de Lüüd maakt. Also vun ju“, verklaart Gesa Retzlaff noch mol, „wi schafft blots den Rahmen. Dat Leven un den Uttuusch, dat maakt ji.“

 

Twüschendörch geev dat Meditaschoon op Platt

 

Un denn güng dat los: Wokeen will wat maken? Wokeen hett en Thema för de Themenwand? Eerst ganz tögerlich – aver denn kreeg de Saak Swung un dor dükerten jümmers mehr geele Zeddel an’e Wand op. Negen Themen sünd dorbi rutsuert: Platt in der Verwaltung, Coaching op Platt, Platt is Platt, Musik un Kunst, Kinnerböker op Platt, Bildung för nachhaltige Entwicklung, Leven op Island, Platt im Betrieb un de Film „Krug an der Wieden“. Geplant ungeplant – un liekers vun all’ns wat dorbi. Beter geiht nich. Jedeen kunn sik denn een, twee oder dree Themen utsöken. Twüschendörch geev dat ok noch wat to’n Verpussen: Meditaschoon op Platt mit Lisa Wrogemann un as Bonscher un Belohnung för all den Drift: De  Tüdelband mit ehr Hörspeel „Ahab“.

 

Veele Frage, veele Antwurten un veel Ideen

 

Aver eerst Mol ran an‘e Arbeit: In‘ Ruum Rungholt sünd Kinnerböker op Platt dat Thema vun Yvonne. Se hett bi Instagram en Siet op’e Been stellt, wo se Böker för de Lütten vörstellen deit. „Aver ik weet gor nich, ob dat so richtig is, wat ik dor maak“, sineert se. „Villicht künnt ji mi seggen, wat ji ju op so en Siet wünscht?“ So kümmt mol vun’e en Siet en Fraag, vun’e anner Siet en Tipp, dor gifft dat en Wunsch un hier en Idee. De Wand mit’e geelen Zeddel warrd jümmers vuller un Yvonne kümmt mit Schrieven gor nich achterran. Brainstorming op Platt. Un so peu á peu warrd ut veele Fragen un Antwurten en System. Op jedeen Fall hett Yvonne veele Huusopgaven mit na Huus nohmen, woans se ehr Siet noch beter maken kann.

Jüst dat is ok de Sinn vun so en Barcamp: Datt jedeen wat vun sein Weten un vun sein Know-how op den groten Hupen ropsmieten deit.

 

Wenn de Politik to de Plattschnacker kümmt . . .

In en annern Ruum wüllt sik Linda Pieper un Sonja Wolf Ideen to dat Thema „Platt in de Verwaltung“ hooln. De beiden sünd as Referentinnen för Minderheitenangelegenheiten in‘e Staatskanzlei tostännig. Dat dreiht sik üm den Paragrafen 82 a. De seggt, datt de Lüüd ehr Anliegen bi de Behörde ok op Platt oder en anner lütte Spraak vörbringen künnt. Sogor de Andräge dörft se op Platt schrieven. Aver woans süht so en Recht in’e Realität ut, fraagt sik de Beiden? Bruukt wi dat? Un wenn, wie schall dat utsehn? Hier si dat Camp en Ort, wo Politik un Sprekergruppen tohoop kaamt un sik uttuuschen künnt. Steffen arbeit to’n Bispiel in’e Stüerbehörde. Kloor scghnackt he Platt mit’e Lüüd, wenn’t geiht. Aver Andräge op Platt? Dat hett dat noch nich geven. Un denn gifft dat en groot Diskuschoon, ob dat denn överhaupt nödig is, all’ns op Platt to överstetten. All de Infos, de Meenungen, de Erfohrungen un den Drift nehmt de beiden Referentinnen nu mit in’e Politik rin. Perfekt.

 

Ut all de verscheden Tampens warrd en Knütten

 

Dat sünd blots twee Bispeel, woans so en Barcamp lopen kann. Ob dat nu Musik is, Kunst, Kultur, Verwalten oder Bildung: Överall is de Drift to spören. Dor kaamt Lüüd mitenannner in‘ Schnack, de sik villicht sünst nienich drapen harrn. Un dor kaamt Ideen bi rut, de villicht hölpt, uns lütte Spraken en Stück wieder vöran to bringen. Dor kümmt Drift in uns Spraak. Un denn warrd ut all de verscheden Tampens vun’e Deelnehmer en groot plattdüütschen Knütten. Un de höllt förwiss.

 

„Dat is en godes Format un dat wüllt wi wieder verfolgen", so Gesa Retzlaff vun’t Plattdüütsche Zentrum in Leck. An‘n 25. März 2023 schall dat dat nächste "platt drift barcamp" geven.