Modellschulschild HP

 

„Wi snackt Platt“ steiht op dat Schild, mit dat nu all 42 Modellschlen för Plattdüütsch in Sleswig-Holsteen för sik warven könen. Wat de Fier för dat Övergeven angeiht, musste Landesfachberaderin för Nedderdüütsch Karen Nehlsen "Plaan B" treken: Statt in'n Rahmen vun den groten Lannesfackdag un vör de ganzen bedeligden Modellschoolleitungen un -lehrers, övergeev Bildungsministerin Karin Prien flankeert vun de Minnerheitenbeopdragte Johannes Callsen en eerste Exemplar an Steed vun all Modellscholen in't Land an Jan Niemann as en vun de eersten Modellschoolakteure. He bedankte sik jüst so an Steed vun all Scholen bildlich mit en Struuß vull vun kreative Ünnerrichtsideen, vun de he en Utwahl de begeisterte Ministerin vörstellt hett. Mit en Klick hier, kann man sik de Opnahm vun de Veranstalten ankieken. 

 

Sprachenatlas

 

In't Fröhjohr 2020 hett de Nedderdüütsch-Afdelen vun de CAU Kiel en Projekt anfungen, wat nu fardig worr is: en Sprakenatlas to'n Hören. Wat is dat?! Dor warrn de verscheden sleswig-holsteenschen Dialekten dokumenteert. 

Düt Projekt geiht över mehrere Länner in Europa weg un dorbi warrt de Fabel „Nordwind und Sonne“ vun Äsop in vele verscheden Spraken un Dialekten översett, inleest un op de Landkoort pinnt. Twüschen April un Oktober 2020 hebbt sik mehr as 80 Lüüd ut all Regionen vun Sleswig-Holsteen mit jemehr Ortsdialekte dor an bedeligt. De Opnahmen dokumenteren de verschedenen Mundoorten vun't Holsteensche, dat sleswigische, dithmarsche as ok dat noordfreesche Plattdüütsch.

Landesfachdag 2020

 

Dat IQSH musste sien Lannesfackdag Nedderdüütsch as Präsenzveranstaltung afseggen un laadt nu na un na in, de grote un dulle Utwahl an Workshops, de jedet Johr in'n Middelpunkt vun düssen Fackdag staht, online mittomaken. Op dat Fackportal vun dat IQSH gifft dat dorto mehr to weten.

Jüst in düt Johr is ünner Corona-Bedingungen düütlich worrn, welke Chancen digitale Lehrformate beden un wo nödig de bruukt warrn. Sodännig kann de Plattünnerricht noch mehr Spaaß maken, jüst so för de Lehrers, as för de Schölers. 

Plattbeats Finale

 

Vunjohr funn dat Finale vun Plattbeats, den plattdüütschen Songcontest för den ganzen Noorden, online statt. Jedeen kunn mitmaken un för den plattdüüschen Song vun't Johr 2020 afstimmen. Negen Bands un Solomusikmakers twüschen 15 un 30 Johr ut ganz Norddüütschland stunnen mit ehren Plattsong to Wahl. Afrüümt hett den eersten Pries de Düütschpunk-Band Jack Pott mit ehren Song "All mien Frünnen". Ganz knapp dorachter op Platz twee is Popmusiker Dennis Samel-Martins kamen mit "An düssen Disch" un op den drütten Platz hebbt Jury un Publikum de Death Metal-Band Armagenda mit "Seelentyrann" wählt. 

För de nächtse Plattbeats-Runn 2020/2021 kann een sik al rüsten un bewarven. Mehr to weten op www.plattbeats.de .

 

IMG 2772bearb

 

De dörven dat, de beiden, ok in Corona-Tieden. Se kamen ut een Huusstand un harrn sik anmellt to unse Fortbillen för Fachlüüd un Ehrenamtlers in Kitas. Na düssen Kurs, de vunjohr wedder vun dat sleswig-holsteensche Sozialministerium un unsen Fördervereen stütt warrt, gifft dat nu al dat teihnt Johr na de Reeg grote Nafraag. Dreemal muss de Start verschaven warrn, an den 23. Mai dorv dat losgahn. Nich all Lüüd, wat lang anmellt weren, muchen nu al mitmaken. Dorför kunnen Lüüd narücken, de eerst noch op de Töövlist stahn harrn. Vör dat losgahn kunn, mussten Regeln verkloort un Schrievkraam erledigt warrn. Allens bruukt mehr Tiet. Wat vördem nevenbi leep, bruukt nu mehr Konzentratschoon.