In unse enige Europa is dat nödig, dat de Minsch sien Heimatspraak bibehöllt. Sunst ward he kopplos un kriggt dat Bävern för so en grote Europa, wo he sik nich wedderfinnen deit.

 

Dat weten de Politiker ok un dorför hett de Europarat an'n 05.11.1992 de "Europäische Charta der Regional- oder Minderheitensprachen" beslaten. Se schall uns helpen, unse plattdüütsche Spraak un Kultur to erholen.

 

Dat Land Schleswig-Holsteen hett dorum an'n 20.03.1998 de plattdüütsche Spraak in de Landesverfaaten opnahmen; siet de 02.12.2014 steiht in Artikel 13 Abs. 2: "Das Land schützt und fördert die Pflege der niederdeutschen Sprache."

 

All in 1993 hett dat Land twee "Zentren für Niederdeutsch", also Plattdüütsch-Zentren, inrichtet; een in Ratzeborg för de Landesdeel Holsteen un een för unse Landesdeel Schleswig in Leck.

 

Wi as Fördervereen helpen in Leck bi de Arbeit mit Ideen un mit Geld. Dorüm beden wi jem/Se/ju, leve Lüüd, warrt Liddmaten in de Fördervereen. Dat kost för en enkelte Minsch 31,-- € in't Johr. För en Kreis, Amt oder Gemeen kost dat 52,-- €, dat kann aver ok wat mehr sien.

 

Un dat schall mokt warn:

  • Unse plattdüütsche Spraak un Kultur in Vereene, Theoter un Literatur schall pleegt warn.
  • In Kinnergoorns un Schooln schall ok Plattdüütsch lehrt un levt warrn.
  • In de Lehrerutbildung mut an Hochschoolen ok Plattdüütsch anboden warn.
  • In de Medien (Fernsehn, Radio, Bläder) mut mehr Plattdüütsch to sehn, to hören un to lesen sien.
  • In Ämter un bi annere Behörden un Institutionen schall en ok Plattdüütsch snacken köön.
  • Wi wüllt de Lüüd verkloren, dat se en Stück Heimat un sik sülben opgeven, wenn se de plattdüütsche Spraak eenfach vergeten doot.